Après avoir remis Boulongne en vostre main,
Avoir les Escossois sauvez de toute oppresse,
Avoir aux Alemans, d’une main vengeresse,
Rendu la liberté sur le fleuve Germain,
Avoir d’un cueur benin et d’un vouloir haultain,
Des Syennois affligez, soulagé la destresse,
Avoir de Corse fait vostre forçe maistresse,
Et fait vostre Piedmont plus grand et plus certain,
Après avoir acquis mille et mille autres gloires,
Sans borner toutesfois voz fatales victoires,
La Trefve vient vers vous, mais c’est bien peu d’honneur :
Car vous serez un jour maistre de tout le monde,
Et dressant l’œil à Dieu, pourrez dire,
Seigneur,
"A vous touche le ciel, à moy la terre et l’onde".